អំពី​សំបុកអាយធី

ប្រវត្តិខ្លីៗរបស់សំបុកអាយធី៖

គេហទំព័រ​សំបុកអាយ​ធី​ត្រូវបាន​បង្កើតឡើង​នៅថ្ងៃទី ៥ខែកក្កដា ឆ្នាំ២០១១។ មុននឹង​សំបុកអាយធី​​​ចាប់កំណើតជាដំបូង​​យើង​បាន​បង្កើត​ជាប្លក់ WordPress មួយ​ដែល​មានឈ្មោះថា៖ www.isharemyworld.wordpress.com។ ដោយ​ក្នុងនោះ isharemyworld បាន​ចុះផ្សាយ​អត្ថបទ​ដែល​ទាក់​ទង​នឹង​ព័ត៌មានវិទ្យា រួមជាមួយ​ការ​កម្សាន្ត​ខ្លះៗ​ដូចជា អត្ថបទ​បែប​ពញ្ញាក់អារម្មណ៍ (ការ​ប្រើ​ពាក្យ​ពេចន៍​ ទាក់ទាញ​ជាដើម)។ គោល​បំណង​ជាបឋម​របស់ isharemyworld គឺគ្រាន់​ទុក​សម្រាប់​ជាឯកសារ​សម្រាប់ខ្លួនឯង – មើលខ្លួនឯង​នៅថ្ងៃក្រោយតែប៉ុន្នោះ។ រហូត​មក​ដល់​ថ្ងៃមួយ isharemyworld បានធ្លោយ​ចុះផ្សាយ​អត្ថបទ​ដែល​បង្ហាញពី សេរៀល (លេខកូដ) នៃ​កម្មវិធី PDF Viewer Pro រួមជាមួយ​មាន​ការ​ដាក់​របាយ​ការណ៍​ (Report) ទៅ​កាន់ WordPress.com ទើប​ isharemyworld ត្រូវបាន​បិទ​ចោលជាស្ថាពរ នៅពាក់កណ្តាលឆ្នាំ ២០១១នេះ (រំលោភ​សិទ្ធិ Term Of Service របស់ wordpress)។ កំឡុង​ពេល​ដែល​ប្រើប្រាស់ WordPress blog isharemyworld នេះ isharemyworld បាន​ឆ្លៀត​បង្កើត Blog ថ្មីមួយទៀត ដោយ​ដាក់ឈ្មោះថា៖ សំបុកអាយធី​នេះឯង! តែស្ថិត​នៅជា www.sombokit.wordpress.com នៅឡើយទេ។ ជា​រឿយៗ សំបុកអាយធីតែង​ទទួល​បាន​ការ​គាំទ្រពី​មិត្តអ្នកអាន រួម​ជាមួយ​ការ​កោតសរសើរ​ផង​ក៏មាន។ បន្ទាប់មក​សំបុកអាយធី បាន​បន្ត​ដាក់​ផ្សាយ​អត្ថបទ​បែប​ព័ត៌មានវិទ្យា(សុទ្ធ ដោយ​មិនមាន​លាយ​ឡំ​ឯកសារ​ផ្នែក​ដទៃឡើយ) ។ ដោយ​បារម្ភ​ពី​ការ​បិទចោល (Suspend) ពីសំណាក់ WordPress សំបុកអាយធី​បានសម្រេច​ចិត្ត​ទិញ ដូមេន និង​សេវា​បង្ហោះ ដោយ​ត្រូវបង់​ប្រាក់ ២៥ដុល្លារ/ឆ្នាំ។ ប៉ុន្តែ​នាពេល​ថ្មីៗនេះ សំបុកអាយធី បានទទួល​ការឧបត្ថម្ភ​សេវា​បង្ហោះ​ដោយ​ឥត​គិត​ថ្លៃ​ពី TITB Hosting ។

គោលបំណង៖​

អ្វី​ដែលជំរុញ​ឲ្យសំបុកអាយធី​បង្កើតជាវ៉ិបសាយ​គឺ ​ក្នុង​គោលគំនិត​រួម​ដែលចង់​ពង្រឹង និងពង្រីក​ភាសាខ្មែរឲ្យ​កាន់តែទូ​លំទូលាយ​នៅលើបណ្តាញ​អ៊ីនធើណេត ឲ្យកាន់តែសម្បូរជាងបច្ចុប្បន្ននេះ និង​ចូលរួម​ចំណែក​​ចែក​រំលែក​ជាបទពិសោធន៍ និងគន្លឹះ​ផ្សេងៗ​ជូនដល់​កូនខ្មែរទូទៅ ដែល​មានបំណង​ចង់​ដឹង និងស្វែងយល់​ពី​វិធី – របៀប ឬគន្លឺះ​នៃ​ការអនុវត្តន៍​ នានាដែល​ទាក់ទង​នឹងផ្នែក​ព័ត៌មានវិទ្យា​ជាដើម។  ឯកសារ និង​អត្ថបទមួយចំនួន​​ដែល​បាន​​ដាក់ផ្សាយ​ស្ទើរ​រៀង​រាល់​ថ្ងៃនេះ គឺ​ត្រូវបាន​ដកស្រង់​ចេញ​ពី​គេហទំព័រ​ល្បីនានា​ (ប្រែ​សម្រួល​ពី​ភាសាអង់គ្លេស) និងមួយចំនួន​ផ្សេងទៀត​ត្រូវបានរៀបចំ​ និង​បង្កើត​ឡើង​ដោយ​សំបុកអាយធី​​ផ្ទាល់។

សេចក្តីរំពឹងទុក៖

តទៅថ្ងៃមុខ សំបុកអាយធីរំពឹង​ទុកថា៖ ទីនេះ​ជា​កន្លែង​ផ្ទុក​ឯកសារ​ចំណេះដឹង​ផ្នែក​ព័ត៌មាន​វិទ្យា (ជាពិសេស​ការអនុវត្តន៍) សម្រាប់​ចែក​រំលែក​ជូន​ដល់​បង​ប្អូន​ជំនាន់ក្រោយ​ គ្រាន់ទុកជាឯកសារយោង។ យ៉ាងណាមិញ សំបុកអាយធី​សូមរង់ចាំទទួល​ការ​រិះគន់​ ក្នុងន័យ​ស្ថាបនា​​របស់​មិត្ត​អ្នកអាន ដើម្បី​កែលម្អ​វ៉ិបសាយ​មួយនេះ ឲ្យរឹតតែ​ប្រសើរ និង​ក្លាយជា​ប្រយោជន៍សម្រាប់អ្នកទាំងអស់គ្នា។ សំបុកអាយធី នឹង​បន្ត​ទទួល​អត្ថបទសំណូមពរ​ពី​​ប្រិយមិត្ត​ទាំង​អស់​គ្នា ហើយសូមសន្យាថា នឹងព្យាយាម​ស្វែង​រក​ឯកសារយោង ឬគន្លឹះបន្ថែម​នានា មក​បំពេញ​តាម​តម្រូវការ​របស់​លោកអ្នក តាមតែសមត្ថភាព​ដែល​អាចធ្វើទៅបាន។

—————————————————-

សូមអរគុណ!

ពីសំបុកអាយធី!